CNY is coming \( ^o ^ )/

蛇年就到了, 邁向新一年, 希望事事都順風順水啦~今年婚後第一年, 屋企好多佈置呢! 真係好想快點放假, 等自己放鬆一下, 近排壓力真係好大, 心結始終都係要靠自己打開, 唯有希望自己唔好諗太多啦‧ 如果可以放鬆到自己, 我相信, 胃都會好番好多...

太耐無黎呢度寫blog喇, 年底發生左好多事呢! Latte 生左bb喇, 係3隻! 最後Latte搵左附近狗友配種...真係好好彩, 我地上個星期係西貢識左一個柴女bb, 叫忌廉, 難得canis同忌廉都玩得埋....其實真係好想Canis有後代啊! 所以黎緊蛇年, 希望可以同忌廉bb玩多d, 2個熟d, 咁第日就有機會喇~~Canis仔要型d呀!! 跟住呢幾日睇番Canis bb時既相, 真係好得意, 好細粒, 手腳粗粗咁, 好懷念呀!

我地去左學拉花class, 雖然只係一堂, 但都獲益良多, 發覺屋企部機...打奶一d都唔得...條wand實在太短喇...

仲有, 睇完嚴浩既專欄後, 忍唔住買左佢一set既書, 而家跟佢既油拔法, 跟左2個幾3個月, 雖然無人地講到咁堅, 但都ok丫, 覺得個人無咁累咁‧我地亦於2個月前左右開始食布緯療法, 每朝食cottage cheese 加 不同既nuts同生果, 希望真係可以吸收到好d既蛋白質啦~佢仲有好多偏方, 但整都幾花時間, 所以而家只係跟住呢兩樣先。